Rusiya Müdafiə Nazirliyi Şərqi Aralıq dənizində təkmil nüvə qabiliyyətinə malik hipersəs qanadlı raketini sınaqdan keçirdiyini açıqlayıb. Rusiyanın təlimləri zamanı “Zirkon” raketinin atıldığı görülüb. Digər tərəfdən, Rusiyanın həyata keçirdiyi təlimin yeri və vaxtı diqqət çəkib. Ukraynanın Rusiyanı vurmaq üçün ABŞ-ın göndərdiyi ATACMS və Böyük Britaniyanın təchiz etdiyi “Storm Shadow” raketlərindən istifadə etməsindən sonra Rusiyadan yeni bir hərəkət gəldi.
“Teleqraf” qəzetində yer alan xəbərə görə, Şərqi Aralıq dənizində donanma və hava qüvvələrinin birgə təlimi zamanı Rusiya inkişaf etmiş nüvə qabiliyyətinə malik hipersəs qanadlı raketini sınaqdan keçirib.
Rusiya Müdafiə Nazirliyinin dərc etdiyi fotoşəkillərdə “Zirkon” raketinin 2018-ci ildə istifadəyə verilmiş “Admiral Qorşkov” freqatının göyərtəsindən buraxıldığı görülüb.
Rusiya Müdafiə Nazirliyindən verilən açıqlamada dekabrın 3-də Şərqi Aralıq dənizində keçirilən təlimdə dəniz bazalı dəqiq raketlərin atıldığı bildirilib. Kremldən verilən açıqlamada “Zirkon” raketinin Mach-9 sürətinə (saatda təxminən 9 min 500 km) çata biləcəyi iddia edilib. Zirkon raketinin çata biləcəyi sürəti qiymətləndirən analitiklər Qərb istehsalı olan ən yaxşı raketdən müdafiə sisteminin belə Zirkon raketinə qarşı aciz qalacağını bildiriblər.
Mütəxəssislər qeyd ediblər ki, döyüş gəmiləri, xüsusən də təyyarədaşıyanlar hipersəs qanadlı raketlərə qarşı son dərəcə həssas ola bilər.
Rusiya mətbuatında yer alan xəbərə görə, Rusiya prezidenti Vladimir Putin dünyanın heç bir ölkəsində bənzəri Zirkon raketinin olmadığını bəyan edib.
Hollandiyada nəşr olunan Rusiya qəzeti “Moskva Tayms”da yer alan xəbərə görə, “Zirkon” raketləri ilə yanaşı “Onyx” və “Kalibr” qanadlı raketləri də uğurla sınaqdan keçirilib. Qeyd edilib ki, “Zirkon” raketindən daha köhnə istehsal ili olan bu raketlər Mach-3 sürətinə (təxminən 3 min 500 km) çata bilir.
Təlimlərdə iştirak etmək üçün bölgədə yerləşdirilən rus əsgərlərinin sayının “artırıldığını” bildirən Rusiya Müdafiə Nazirliyi təlimə Rusiya Hərbi Dəniz Qüvvələri və Rusiya Hava-Kosmik Qüvvələrindən 1000-dən çox hərbçinin qatıldığını bildirib. Təlimdə 10 döyüş gəmisi və dəstək gəmisi, sualtı qayıqlar və Mig-24 döyüş təyyarələrindən istifadə edildiyi bildirildi. Rusiya rəsmiləri bütün atışların hədəflərə uğurla çatdığını qeyd edərkən, təlimin vaxtı və yeri diqqət çəkib.
Rusiya ordusunun təlimi Suriyada Əsəd rejiminə müxalif rejim əleyhdarı qrupların Hələbə nəzarəti ələ keçirməsindən sonra baş tutub.
Analitiklər Rusiyanın Aralıq dənizindəki liman şəhəri olan Tartus yaxınlığındakı dəniz bazası da daxil olmaqla, on ildir Suriyada əhəmiyyətli hərbi varlığa malik olduğunu ifadə edərək, Tartus hərbi dəniz bazasının rejim əleyhinə qruplar tərəfindən təhdid altında olduğunu qiymətləndiriblər.
Müdafiə analitiki Sutton, “Suriyadakı dəyişiklik dəniz bazasını risk altına qoyur. Rusiyanın donanma gəmilərini evakuasiya edə biləcəyinə dair işarələr var” deyib.
Mənbə: Hurriyet.Tr