Bugun.tv xəbər verir ki, İtaliyanın tarixi Komo şəhərinin bələdiyyə sədri Alessandro Rapinese elektrikli velosipedin vurması nəticəsində xəsarət aldıqdan sonra şəhərin müəyyən ərazilərində velosiped sürülməsini qadağan edib.
Qərara əsasən, sentyabr ayından etibarən velosipedçilər təxminən 30 küçəni əhatə edən ərazidə velosipeddən düşərək piyada hərəkət etməli olacaqlar. Bələdiyyə sədri bu addımın ictimai təhlükəsizliyin artırılması üçün vacib olduğunu bildirib.
Rapinese İtaliyanın ANSA xəbər agentliyinə açıqlamasında elektrikli velosipedin vurmasının necə hiss olduğunu şəxsən bildiyini deyib. Onun sözlərinə görə, qərarın qəbul edilməsinə iyul ayında baş verən hadisə təsir edib.
Məlumata görə, bələdiyyə sədri iyul ayında şəhər administrasiyasının binasından çıxarkən elektrikli velosipedlə toqquşub. Hadisə zamanı xəstəxanaya yerləşdirilməyib. Velosipedçidən isə hazırda xəbər yoxdur.
Qadağa şəhər mərkəzində avtomobillər və yük maşınları üçün tətbiq edilən yeni trafik qaydaları paketinin bir hissəsidir. Məhdudiyyətlər əsasən turistlərin çox olduğu tarixi mərkəzdə tətbiq olunacaq. Qərar həm elektrikli, həm də adi velosipedlərə şamil ediləcək.
Qərar yerli sakinlər arasında narazılıq yaradıb. Civitas Como adlı vətəndaş qrupu qadağanı mübahisəli və yanlış adlandırıb. Nova Como təşkilatı isə sentyabrın 12-də qərara etiraz olaraq velosiped yürüşü keçirməyi planlaşdırır.
Mənbə: TRT Haber