Çin hökuməti ABŞ-ın tətbiq etdiyi yeni tarif və ticarət araşdırmalarına cavab olaraq rəsmi şəkildə “ticarət maneəsi” istintaqına başladığını açıqlayıb.
Çin Ticarət Nazirliyinin yaydığı məlumata görə, ABŞ tərəfindən “istehsal gücü artıqlığı” və “məcburi əmək” iddiaları ilə başladılan araşdırmalar ədalətsiz hesab olunur. Rəsmi Pekin bu addımların beynəlxalq ticarət qaydalarına zidd olduğunu və qlobal təchizat zəncirlərinə mənfi təsir göstərə biləcəyini bildirib.
Açıqlamada vurğulanıb ki, ABŞ-ın tətbiq etdiyi tədbirlər xüsusilə “yaşıl enerji” sektorunda ticarətə zərbə vurur və Çin bu sahədə öz sənaye maraqlarını qorumaqda qərarlıdır.
Qeyd edək ki, daha əvvəl ABŞ Ali Məhkəməsi Prezident Donald Trump tərəfindən tətbiq olunan bəzi tariflərin hüquqi əsaslarını şübhə altına almışdı. Bu qərardan sonra ABŞ administrasiyası tarifləri yeni hüquqi çərçivəyə salmaq üçün əlavə araşdırmalara start verib.
Vaşinqton xüsusilə 1974-cü il Ticarət Qanununun 301-ci maddəsinə əsaslanaraq bir sıra ölkələrə qarşı ticarət tədbirləri görməyi planlaşdırır. Bu maddə ABŞ prezidentinə xarici ölkələrin ticarət siyasətlərinə qarşı cavab tədbirləri tətbiq etmək səlahiyyəti verir.
Analitiklər hesab edir ki, Çin və ABŞ arasında bu qarşılıqlı addımlar qlobal ticarət münasibətlərində yeni gərginlik mərhələsinin başlanğıcı ola bilər.
Mənbə: TrtHaber