“Çinin baş diplomatı Vanq Yinin Rusiya səfəri Amerika Prezidentinin Ukrayna səfəri ilə eyni vaxta təsadüf edir. Və Co Baydenin verdiyi mesajlar kontekstində Çin-Rusiya münasibətlərinin növbəti bir mərhələyə qədəm qoyması gündəm təşkil edir. Bu da onunla əlaqədardır ki, bu səfərdən öncə Münxen Təhlükəsizlik Konfransı baş verdi və orada Çinin də “bostanına daş atdılar”. “Rusiyadan sonra növbə Çinindir” kimi bəyanatlar verildi”
Bu fikri Bugun.tv-yə özəl açıqlamasında siyasi ekspert Əziz Əlibəyli bildirdi.
Politoloqun sözlərinə görə, Çinin də Ukrayna müharibəsi nəticələrinə görə öz hesabları var.
“Bunlar müzakirə olunmalıdır. Bu ayın 24-də Rusiya və Qərb İttifaqı arasındakı savaşın bir ili tamam olur. Əslində bu bir il heç nəyi həll etmədi. Amma bu müddət ərzində tərəflərədən Qərb artıq Münxendə bəyan etdi ki, sona qədər savaşacaq. Bir sözlə, birlik nümayiş etdirdi. Bu məqamda Çinin baş diplomatının bu səfəri həm də bir növ “bazarlıq” kimi çıxır. Burada məqsəd Rusiyanın yanında olacaqlarını bəyan etməklə yanaşı, həm də böyük ölçüdə güzəştlər qopartmaqdır”.