Birləşmiş Millətlər Təşkilatının Baş katibi Antonio Quterreş beynəlxalq hüququn pozulduğu və qlobal əməkdaşlığın zəiflədiyi bir dövrdə cəzasızlığın münaqişələri dərinləşdirdiyini bildirib.
O, Nyu-Yorkda BMT Baş Qərargahında 2026-cı il üzrə prioritetlərə həsr olunmuş mətbuat konfransında çıxış edib.
Quterreşin sözlərinə görə, geosiyasi parçalanmalar və məsuliyyətsiz addımlar təhlükəli reaksiyalara yol açır, “gücün qanunu” isə “hüququn gücünü” üstələyir. Baş katib vurğulayıb ki, beynəlxalq hüququn tapdanması və çoxtərəfli institutlara təzyiqlər sistemin sabitliyini sarsıdır, cəzasızlıq isə gərginliyin artmasını və etimadsızlığın dərinləşməsini sürətləndirir.
O, həmçinin dərinləşən bərabərsizliklərə, iqlim dəyişikliyinə və texnologiyanın sürətli təsirinə diqqət çəkərək, gücün hökumətlərdən özəl texnologiya şirkətlərinə doğru keçdiyini bildirib.
Quterreş qeyd edib ki, qlobal problemlərin həlli nə tək bir gücün dominantlığı, nə də dünyanın rəqabət zonalarına bölünməsi ilə mümkündür. Onun sözlərinə görə, strukturlar köhnələ bilər, lakin ədalət, hüquq və ortaq məsuliyyət kimi dəyərlər dəyişməz qalır.
Mənbə: TrtHaber