Bugun.tv xəbər verir ki, Böyük Britaniyada elm adamları sahillərdə yeni növ dəniz şlakları aşkar ediblər. Bu barədə BBC məlumat yayıb.
Pleurobranchaea britannica adlı ilbiz İngiltərənin cənub-şərqində tədqiqat gəmisindən tutulub. Onu kəşf edən Ətraf Mühit, Balıqçılıq və Su Təsərrüfatı Tədqiqatları Mərkəzindən Ross Bullimore Böyük Britaniya və İrlandiya sahillərində təxminən 100 növ dəniz şlaklarının olduğunu söyləyib. Lakin o, əvvəllər naməlum bir heyvanı tutduğunu dərhal anlayıb.
“Mikroskopik olmayan yeni növ tapmaq olduqca həyəcanvericidir. Bu onu deməyə əsas verir ki, qarşıda hələ çox iş var”, – Bullimor bildirib.
Pleurobranchaea cinsinin üzvlərinə ümumiyyətlə İspaniyanın şimalında, Seneqalda və Aralıq dənizində rast gəlinir. Alimlərin fikrincə, onlar okeanların rekord dərəcədə istiləşməsi səbəbindən Britaniya sahillərində peyda olublar. Bullimore hesab edir ki, Pleurobranchaea’nın adi yaşayış yerlərindən bu qədər uzaqda görünməsi onların iqlim dəyişikliyi səbəbindən daha da geniş yayıla biləcəyini göstərib.
Dəniz şlakları qabıqsız dəniz ilbizləridir. Təxminən beş santimetr uzunluğuna baxmayaraq, bu heyvanlar zirvə yırtıcılarıdır. Yəni qida zəncirində ən yüksək yeri tuturlar. Bu mollyuskalar iqlim dəyişikliyinə çox həssasdırlar. Bu onları elm adamları üçün dəniz ekosistemlərindəki dəyişiklikləri təhlil etməyə kömək etməkdə “göstərici növ” halına gətirib.
Müxbir Qaytən Qasımzadə
Mənbə lenta.ru