Deputat Ceyhun Məmmədov öz sosial media hesabında regiondakı son siyasi vəziyyətlə bağlı şərh verib.
O bildirib ki, İran ilə İsrail arasında artan gərginlik və bölgədə baş verən dron insidentləri təhlükəsizlik risklərini artırır və diqqətli diplomatiyanın vacibliyini göstərir.
Məmmədov vurğulayıb ki, Azərbaycanın Naxçıvan bölgəsi və Türkiyə istiqamətində yayılan xəbərlər regiondakı sabitliyin həssas olduğunu göstərir. “Azərbaycan hər zaman sülhə, beynəlxalq hüquqa və qarşılıqlı hörmət prinsiplərinə əsaslanan siyasət yürüdüb”, – deyə deputat əlavə edib.
O, Azərbaycan və Türkiyə arasında mövcud olan qardaşlıq münasibətlərini də xüsusi qeyd edib. Deputatın sözlərinə görə, “Bir millət, iki dövlət” anlayışı çətin günlərdə qarşılıqlı dəstək və həmrəyliyin real nümunəsidir. Türkiyə Prezidenti Recep Tayyip Erdoğan ilə Azərbaycan Prezidenti İlham Əliyev arasında baş tutan dəstək zəngləri iki ölkənin hər zaman bir-birinin yanında olduğunu göstərir.
Ceyhun Məmmədov həmçinin Azərbaycanın humanitar siyasətinə diqqət çəkib. Prezident İlham Əliyevin İrana humanitar yardım göstərilməsi barədə qərarının regionda qarşıdurmanı deyil, humanizmi və qonşuluq münasibətlərini üstün tutduğunu nümayiş etdirdiyini bildirib. Deputat qeyd edib ki, bu yanaşma Azərbaycanın balanslı və məsuliyyətli siyasətinin nümunəsidir və ölkəmizin beynəlxalq arenada etibarlı tərəfdaş kimi mövqeyini gücləndirir.
