Siyasi ekspert Məhəmməd Əsədullazadə bildirib ki, Azərbaycanın Ermənistana dörd məhbusu təhvil verməsində hər hansı problem mövcud deyil.
Bugun.tv– xəbər verir ki, onun sosial media hesabında paylaşımına görə, bu addım iki ölkə arasında münasibətlərin inkişafına və sülh istiqamətində etimadın möhkəmləndirilməsinə xidmət edir.
Ekspert qeyd edib ki, hazırda Ermənistanda seçkilər ərəfəsidir və bu prosesdə baş nazir Nikol Paşinyanın mövqeyinin güclənməsi mühüm əhəmiyyət daşıyır.
Məhəmməd Əsədullazadənin fikrincə, Paşinyanın seçkilərdə qalib gəlməsi “yekun sülh müqaviləsi”nin imzalanması ehtimalını artırır. Dörd məhbusun təhvil verilməsi də Paşinyan tərəfindən seçki kampaniyasında siyasi üstünlük kimi istifadə oluna bilər.
Paylaşımda vurğulanıb ki, Azərbaycan tərəfindən həbs edilən bütün ermənilər cinayət törətmiş şəxslərdir. Onlar Azərbaycanın öz ərazilərində saxlanılıb və törətdikləri cinayətlər sübuta yetirilib.
Siyasi ekspert Məhəmməd Əsədullazadə diqqətə çatdırıb ki, Ermənistan tərəfi Zəngəzur dəhlizi ilə bağlı praktik addımlar atdıqdan sonra Azərbaycan humanitar jest olaraq dörd erməni məhbusu təhvil verib. Bununla yanaşı, politoloq bildirib ki, Qarabağda separatçı rejimə və qanunsuz silahlı birləşmələrə rəhbərlik etmiş şəxslərin Ermənistana verilməsi mümkün deyil.
Onun sözlərinə görə, bu şəxslərin Ermənistanda da qəbul olunmaması ehtimalı yüksəkdir. Çünki onlar Ermənistana təhvil verilərsə, potensial olaraq Nikol Paşinyana qarşı müxalif mövqedən çıxış edə və ölkədə revanşizmin güclənməsinə səbəb ola bilərlər.