Bugun.tv-nin “OptaAnalyst” saytından əldə etdiyi məlumata görə, cari il üçün dünyanın ən yaxşı futbol komandalarının adları açıqlanıb.
“Qarabağ” 13 500 komandanın yer aldığı reytinqdə 66-cıdır.
Məlumat Opta statistika platformasının tərtib etdiyi siyahıda öz əksini tapıb. Bu platforma 0-dan 100-ə qədər miqyasda 13500-ə yaxın yerli futbol komandasına bacarıq balı təyin edən qlobal komanda sıralama sistemidir. Burada sıfır dünyanın ən pis reytinqli komandası və 100-ü dünyanın ən yaxşı komandası kimi hesaba alınır.
“Köhlən atlar” Portuqaliya “Braqa”sı və Braziliya “Flamenqo”su ilə birlikdə 84,3 reytinq xalına malikdir.
Azərbaycan Premyer Liqasında çıxış edən “Neftçi” (76,8) 256-cı, “Sabah” (76) 287-ci, “Zirə” (72,9) 540-cı, “Qəbələ” (71,3) 693-cü, “Turan Tovuz” (66,8) 1321-ci, “Şamaxı” (66,4) 1407-ci, “Sumqayıt” (65,5) 1575-ci, “Kəpəz” (64,6) 1759-cu, “Səbail” (63,9) isə 1896-cıdır.
13 500 komandanın yer aldığı cədvələ Almaniya təmsilçisi “Bavariya” (100) başçılıq edir. İngiltərənin “Mançester Siti” klubu (98,9) ikinci, “Liverpul” komandası isə (95,6) üçüncü pillədə qərarlaşıb.