Bugun.tv xəbər verir ki, “Əlil Qadınlar Cəmiyyəti” İctimai Birliyinin (ƏQC.İB) Qadınlara qarşı zorakılığa son qoymaq üçün BMT-nin Etimad Fondunun (UN Trust Fund) maliyyə dəstəyi ilə “Bakı, Gəncə şəhərləri, Qusar, Quba. Xaçmaz rayonlarında əlilliyi olan qadın və qızların ictimai xidmətlərə çıxışının təkmilləşdirilməsi” layihəsi çərçivəsində Gəncə şəhərində seminar keçirilib. Seminarda qadın və qızların hüquqları, psixoloji, sosial və məşğulluq sahələri əhatə olunub. 
Bu barədə Bugün televiziyasına cəmiyyətin mətbuat katibi Elnarə Dərziyeva məlumat verib. Onun sözlərinə görə, layihədə nəzərdə tutulan seminarın məqsədi, məcburi köçkünlər arasında əlillyi olan qadın və qızlara qarşı ictimai yerlərdə münasibət, davranış problemlərinə diqqət çəkmək, onlara qarşı zorakılığın hallarının qarşısının alınmasıdır. Bununla yanaşı onların yaşadığı icmalar tərəfindən dəstəklənməsinin vacibliyi ilə bağlı yerli icma üzvləri ilə görüşmək və diskrimasiyanın aradan qaldırılmaq da əsas məqsədlərdəndir.
“Layihə çərçivəsində mövcud problemləri tədbir iştirakçıları ilə birlikdə müzakirə etdik. Qeyd edim ki, seminarda müxtəlif sahələrdən icma nümayəndələri və əlilliyi olan şəxslərin yaxınları, qohumları və özləri iştirak edirdilər. Xüsusi vurğulamalıyam ki, belə seminarlar təşkili zamanı hər dəfə yeni iştirakçıların dəvət edilməsi yeni dəstək qruplarının yaradılmasına, innovasiyaların artmasına, şəbəkənin böyüməsinə, yeni ideya və təkliflərin verilməsinə səbəb olur” – deyə, E. Dərziyeva bildirib. 
Qeyd edək ki, tədbirdə 30 nəfər iştirak edib.