“İntellektual və tolerant bir mühitdə yaşamaq istəyirəm. Bu səbəbdən də 2006-da gənc yaşlarımda Azərbaycana qayıtdım, çünki mən bir azərbaycanlıyam! Təfəkkür olaraq azərbaycanlı milli məfkurəsinə sahibəm. Bir çox hobbim var. Ən sevdiyim isə ana dilində şeir yazmaqdır. Yaradıcı qabiliyyətlərim və düşüncə tərzim azərbaycanlı prizmasından təzahür edir”.
Bugun.tv xəbər verir ki, bu fikri azərbaycanlı iş adamı, Azərbaycan İnformasiya və Kommunikasiya Texnologiyaları Sənayesi Assosiasiyasının İdarə Heyətinin sədri Elvin Abbasov sosial media hesabında qeyd edib.
O, Azərbaycan vətəndaşı kimi kəşfləri ilə dünyada tanınmasını istədiyini bildirib.
“Burada- Azərbaycanda öz bacarıqlarımla əlavə dəyər yaratmaq istəyirəm. Ölkəmi, dilimi, dinimi sevirəm və gələcəyimə inanıram. Bu səbəbdən də bütün bilik və bacarıqlarımı bölüşürəm, paylaşıram, həmçinin seminarlar, konferanslar verirəm. Dəyər yaratmaq üçün dəyərli olmaq, dəyərli olmaq üçün faydalı olmaq, faydalı olmaq üçün bilikli və intellektual olmaq, intellektual olmaq üçün tolerant olmaq lazımdır. Tolerant olmaq üçün isə şəxsi keyfiyyətlərə malik olmaq lazımdır. Fundamental normalara riayət etmək bəzən kifayət edir”, -E. Abbasov vurğulayıb.