Bugun.tv xəbər verir ki, Böyük Britaniyada quru qoşunlarının şəxsi heyətinə saqqal və bığ uzatmağa qoyulan qadağa aradan qaldırılıb.
Böyük Britaniyanın müdafiə naziri Qrant Şapps X hesabında etdiyi paylaşımda bildirib ki, sorğuya əsasən, kişilərin 54 faizi saqqal və bığ saxlayır. “Ordunun köhnəlmiş saqqal qadağasını yenidən qiymətləndirməsini istədim. Bu gün qaydalarda mənalı bir dəyişiklik edildi”, – Şapps deyib.
BBC-yə danışan ordu sözçüsü, qadağanın aylarla davam edən qiymətləndirmədən sonra qaldırıldığını bildirib.
Təraşın yalnız xüsusi hallarda tələb olunacağını dəyərləndirən sözçü qadağanın aradan qaldırılmasından sonra gənclərin orduya getmə nisbətinin artacağını gözlədiklərini qeyd edib.
Yeni nizamnaməyə əsasən, quru qoşunlarında xidmət edən əsgərlərə 2,5 santimetrə qədər saqqal saxlamağa icazə veriləcək. Əsgərlərin boyunları və yanaq sümükləri qırxılacaq, saqqalları ölçüyə görə bərabər, səliqəli və həddən artıq boyanmamış olacaq.