Mobil oyun tarixinin ən ikonik oyunlarından biri olan Flappy Bird, uzun illər səssizlikdən sonra Android istifadəçiləri üçün geri döndü.
Mobil oyun dünyasının əfsanələrindən sayılan Flappy Bird on ildən artıq müddətdən sonra səhnəyə qayıdıb.
Polygon.com-un məlumatına görə, 2014-cü ildə ani yüksəlişindən sonra tərtibatçısı Dong Nguyen tərəfindən gözlənilmədən silinən oyun, yalnız Epic Games Store-un Android platformasına qayıdıb.
FLAPPY BIRD KRİPTOVALYUTA ƏSASLI OLACAQ?
Flappy Bird Publishing tərəfindən nəşr olunan yeni versiya yalnız reklamlardan və tətbiqdaxili satınalmalardan əldə edilən gəlir hesabına maliyyələşdirilir. Flappy üçün kosmetik dəbilqə kimi əşyaları oyunda almaq olar. Şirkət həmçinin keçən il ortaya çıxan kriptovalyuta şayiələrinə qarşı açıq mövqe nümayiş etdirərək oyunun “heç vaxt Web3 elementlərini ehtiva etməyəcəyini” vurğulayıb.
Prodüserlər 2025-ci il ərzində oyuna yeni dünyalar, personajlar və mövzuların əlavə ediləcəyini bildiriblər. Ancaq orijinal oyunun tərtibatçısı Dong Nguyen yeni versiya ilə heç bir əlaqəsinin olmadığını və heç bir gəlir əldə etmədiyini bildirib. Nguyen Flappy Bird üçün ticarət markasını satmadı və yeni yaradıcılar “tərk edilmiş ticarət nişanını” alıb layihəni canlandırdılar.
2013-cü ildə çıxan və 2014-cü ilin əvvəlində App Store-da ən çox yüklənən oyuna çevrilən Flappy Bird, asılılıq yaratdığı səbəbiylə onun tərtibatçısı tərəfindən nəşrdən silindi. Oyun sadəliyi və çətinlik səviyyəsi ilə milyonların sevimlisinə çevrildi. Onun yerini tutan yüzlərlə klon heç vaxt eyni təsirə malik olmayıb.
Mənbə: TgrtHaber