Azərbaycan prezidenti İlham Əliyev Ermənistanın yeni silahlar əldə etdiyini bəyan edərək, “Bu vəziyyət göstərir ki, onlar yeni müharibəyə hazırlaşırlar. Onda onları yenidən müharibəyə kim sürükləyir? Fransa və Fransa prezidenti” deyib.
Azərbaycan prezidenti İlham Əliyev Bakıda keçirilən 12-ci Qlobal Bakı Forumunun açılışındakı çıxışında ölkəsinin Birləşmiş Millətlər Təşkilatının İqlim Dəyişikliyi üzrə Tərəflər Konfransına ev sahibliyi etməsinə qarşı bəzi Qərb dövlətləri tərəfindən aparılan qarayaxma kampaniyalarından danışıb.
Əliyev ABŞ Dövlət Departamentinin göstərişi ilə “Washington Post”, “New York Times”, “Politico”, “Newsweek”, “Associated Press” kimi “saxta xəbər” mənbələrinin Azərbaycan əleyhinə yazılar hazırladığını qiymətləndirərək, Fransa Prezidenti Emmanuel Makronun göstərişi ilə “Le Monde”, “Fiqaro” kimi media qurumlarının da Azərbaycan əleyhinə nəşrlər hazırladığını qeyd edib.
Əliyev Azərbaycana qarşı aparılan qarayaxma kampaniyalarının səbəbini “Çünki bizim suverenliyimiz və ərazi bütövlüyümüzü tam təmin etmək istiqamətində siyasətimizi dəyişə bilmədilər. Çünki onlar qəbul etmək istəmirdilər ki, Qafqazda öz maraqlarını müdafiə edən, “böyük rəislər”in qarşısında həmişə “hə, cənab” deməyən bir ölkə var” deyə izah edib.
“Ermənistana inamımız sıfırdır”
Ermənistanın işğalı nəticəsində Azərbaycan xalqının çəkdiyi çətinlikləri unutmadıqlarını və unutmayacaqlarını vurğulayan Əliyev deyib:
“Bizim Ermənistana inamımız sıfırdır. Ona görə də onların dediklərinə inanmırıq. Onların dedikləri bizim üçün heç bir əhəmiyyət kəsb etmir. Bizə sənədlər, yazılı sənədlər lazımdır. Biz onların konstitusiyasında Azərbaycana qarşı ərazi iddialarının olmasını istəyirik. ATƏT-in Minsk Qrupu buraxılmalıdır”.
Ermənistanın yeni silahlar almasına diqqət çəkən Əliyev, “Bu vəziyyət göstərir ki, onlar yeni müharibəyə hazırlaşırlar. Deməli, onları yenidən müharibəyə kim sürükləyir? Fransa və Fransa prezidenti. Bu gün Ermənistana başqa yerdə lazım ola biləcək Sezar haubitsaları göndərilir. Əgər sülh istəyirlərsə, buna ehtiyac yoxdur” deyib.
Mənbə: Anadolu Agentliyi