“Əlilliyi olan qız və qadınlarımız fikir və düşüncələrini sərbəst şəkildə ifadə edə bilmirlər. Onlara kömək lazımdır. Mən hər kəsə səslənirəm, gəlin, əlilliyi olan qadınlarımıza birlikdə dəstək göstərək”.
Bu fikirləri Bugun.tv-yə müsahibəsində “Əlil Qadınlar Cəmiyyəti” İctimai Birliyinin sədri Məhluqə Rəhimova bildirib. O, əlilliyi olan qız və qadınlarımızın fikir və düşüncələrini ictimaiyyətə çatdıra bilməsi məqsədilə BMT-nin Etimad fondu ilə birlikdə gerçəkləşdirdikləri layihənin 6 aylıq hesabatını açıqlayıb.
“Biz bu gün dövlətin qarşısında hesabat veririk. Layihəmiz 2022-ci ilin sentyabr ayından başlayıb. Bakı, Gəncə, Quba, Xaçmaz rayonlarını əhatə edir. Burada təlimlər, dəyirmi masa, görüşlər və dövlət qurumlarının iştirakı ilə koordinasiya şurası, sosial roliklər, mətbuata çıxış və s. keçirilir. 6 ay müddətində böyük işlər görmüşük. Azərbaycanda əlilliyi olan qız və qadınların, əsasən də, qaçqınlığı olan qadınların problemlərinin gündəmə gətirilməsi, BMT yanında Azərbaycan həqiqətləri ilə bağlı reallıqların əks olunması, hesabatların verilməsi, təqdimat hazırlanması və dövlət qurumlarına göndərilməsi bizim üçün böyük bir uğurdur. Bu 6 ayda mətbuatın bizimlə olmasına görə, sizlərə, bütün media nümayəndələrinə təşəkkür edirəm! Məhz siz, əlilliyi olan qadın və qızların problemlərini gündəmə gətirirsiniz. Biz də belə problemlərin həllinə tez bir zamanda nail ola bilmək üçün mobil dəstək yaratmışıq. Hamımız birlikdə, doğurdan da, böyük işlər görürük və görəcəyik”, – birlik sədri vurğulayıb.
Onun sözlərinə görə, həyata keçirdikləri layihənin müddəti 3 ildir və hər ay davamlı şəkildə şəhər və rayonlarda gerçəkləşdirilir.
Müxbir: İntizar Əmirova