Yeddilik Qrupu (G7) ölkələri Rusiya neftinin alışını artıran və Moskvaya sanksiyalardan yayınmağa kömək edən ölkələrə təzyiqi artırmağı ciddi şəkildə nəzərdən keçirir. Bu barədə iqtisadi cəhətdən inkişaf etmiş yeddi ölkənin qeyri-formal klubunun maliyyə nazirlərinin bəyanatında deyilir.
“Biz Rusiyaya yardım göstərən dövlət və şirkətlərə, o cümlədən Rusiya neftindən hasil edilən emal olunmuş neft məhsullarına qarşı ticarət tədbirləri və digər məhdudiyyətlərin tətbiqi imkanlarını ciddi şəkildə nəzərdən keçiririk”, – deyə məlumatda bildirilir.
G7 həmçinin Rusiyadan qalan idxalı, o cümlədən enerjini tamamilə aradan qaldırmaq məqsədi ilə əhəmiyyətli dərəcədə azaltmaq üçün tədbirlər görməyə hazır olduğunu bəyan edib. G7 ölkələri Rusiyanın gəlirlərinin azaldılmasına yönəlmiş tariflər, idxal və ixrac qadağaları da daxil olmaqla ticarət tədbirlərinin qəbul edilməsi zərurəti barədə razılığa gəliblər, kommünikedə bildirilir.
“Biz Rusiyanı gəlirdən məhrum etmək səylərinin bir hissəsi kimi ticarət tədbirlərinin, o cümlədən tariflərin, idxal və ixrac qadağalarının vacibliyini bir daha təsdiqlədik. Rusiyadan qalan idxalı, o cümlədən karbohidrogen idxalını tamamilə aradan qaldırmaq məqsədi ilə əhəmiyyətli dərəcədə azaldılmasına yönəlmiş konkret tədbirlər görəcəyik”, – Böyük Britaniya, Almaniya, İtaliya, Kanada, Fransa və Yaponiyanın maliyyə nazirləri qeyd ediblər.
G7 Rusiya iqtisadiyyatının “energetika, maliyyə sektoru, müdafiə sənayesi bazası, xüsusi iqtisadi zonalar, eləcə də bu fəaliyyətləri asanlaşdıran və faydalanan fiziki və hüquqi şəxslər” kimi əsas sektorlarına qarşı sanksiyaları gücləndirməyi vəd edib.
Mənbə: mail.ru