Afrika Birliyinin (AB) Sülh və Təhlükəsizlik Şurası (PSC) Ginenin təşkilata üzvlüyünün bərpa edildiyini açıqlayıb. Qərar şuranın 1325-ci iclasında ölkədəki siyasi keçid prosesi və mövcud vəziyyətin qiymətləndirilməsindən sonra qəbul olunub.
PSC tərəfindən yayımlanan bəyanatda bildirilib ki, Afrika Demokratiya, Seçkilər və İdarəetmə Xartiyasının 26-cı maddəsinə uyğun olaraq Gine Respublikasının Afrika Birliyi fəaliyyətlərində iştirakının dayandırılması qərarı ləğv edilib. Şura Qərbi Afrika ölkəsini Birliyin fəaliyyətlərinə dərhal yenidən qoşulmağa dəvət edib.
Açıqlamada Ginedə siyasi keçid yol xəritəsinin icrası çərçivəsində atılan müsbət addımlar yüksək qiymətləndirilib. Xüsusilə 28 dekabr 2025-ci ildə keçirilmiş prezident seçkilərinin uğurla təşkil olunması bu prosesin mühüm nəticəsi kimi qeyd edilib.
Xatırladaq ki, Gine 2021-ci ilin sentyabrında baş vermiş hərbi çevrilişdən sonra Afrika Birliyindən uzaqlaşdırılmışdı. Üzvlüyün bərpası ölkənin regional və beynəlxalq arenaya reinteqrasiyası baxımından mühüm addım kimi dəyərləndirilir.
Mənbə: İlkha