Texnologiya nəhəngi Google-un çətir şirkəti Alphabet, süni intellektin (AI) istifadəsi ilə bağlı siyasətlərini yenilədi və əvvəllər qadağan etdiyi bəzi sahələrə qapı açdı. Şirkət silahlarda süni intellektin istifadəsi ilə bağlı öhdəliyini geri götürüb.
Şirkət 2018-ci ildə dərc etdiyi, “zərər verə biləcək” istifadə sahələrini istisna edən qaydaları ləğv etdi. Bu dəyişiklik silah inkişafı və müşahidə texnologiyaları kimi sahələrdə süni intellektin istifadəsinə yol açdı.
Google-un DeepMind süni intellekt laboratoriyasının rəhbəri Demis Hassabis və şirkətin baş vitse-prezidenti Ceyms Manyika dəyişikliyi müdafiə edən bloq yazısı dərc ediblər. Məqalədə deyilirdi ki, “Biznes və demokratik hökumətlər milli təhlükəsizliyi dəstəkləyən süni intellekt üzərində əməkdaşlıq etməlidir”.
Süni intellektin artan təsiri
Google rəsmiləri vurğuladılar ki, süni intellekt artıq laboratoriyalarda araşdırma mövzusundan cib telefonları və internet kimi geniş yayılmış texnologiyaya keçib. Şirkət, buna görə də, əsas süni intellekt prinsiplərinə yenidən baxılmalı olduğunu bildirdi.
Bununla belə, döyüş meydanlarında və müşahidə sistemlərində süni intellektin istifadəsi hələ də mübahisəli məsələdir. 2018-ci ildə Google əməkdaşları ABŞ Müdafiə Nazirliyi ilə həyata keçirilən “Project Maven” adlı süni intellekt layihəsinə qarşı çıxıb və minlərlə əməkdaşın imzaladığı petisiyadan sonra şirkət bu layihəni davam etdirməmək qərarına gəlib.
78 milyard dollar süni intellektə investisiya
Google süni intellektə investisiyalarını artırmağa davam edir. Şirkətin açıqladığı son maliyyə hesabatına görə, 2025-ci ildə süni intellekt layihələrinə 78 milyard dollar xərcləmək planlaşdırılır. Bu məbləğ bazar gözləntilərindən 30 faiz çoxdur.
Digər tərəfdən, Google-un AI platforması Gemini, axtarış nəticələrində önə çəkilərək istifadəçilərə süni intellekt dəstəkli xülasələr təqdim edir. Şirkət süni intellektə əsaslanan axtarış və infrastruktur layihələri üzrə işlərini sürətləndirir.
Alphabet-in maliyyə nəticələri gözləntilərin altında olsa da, rəqəmsal reklam gəlirlərindəki 10 faizlik artım diqqət çəkib. Xüsusilə ABŞ seçkiləri Google-un reklam gəlirlərini artıran mühüm amillər arasında idi.
Mənbə: TrtHaber