Naməlum şirkət uzaqdan işləmə modeli ilə subpodratlı işçi işə götürüb. 4 ay ərzində şirkət şəbəkəsinə çıxışı olan işçinin əslində bədnam Şimali Koreyalı kibercinayətkar olduğunu öyrənəndə çox gec idi. Şirkət həmçinin aşkar edib ki, bu kibercinayətkar öz iş tarixini və şəxsi məlumatlarını saxta yolla təqdim edib.
Naməlum şirkət uzaqdan işləmək üçün yeni işçilər işə götürüb. Qısa müddətdən sonra haker şirkətin kompüter şəbəkəsinə daxil olub, şirkətin məxfi məlumatlarını kopyalayıb və şirkətdən fidyə tələb edib.
İngiltərə, ABŞ və ya Avstraliyada olduğu düşünülən şirkət adını açıqlamaq istəməyib. Lakin Secureworks adlı kibertəhlükəsizlik şirkəti hadisənin təfərrüatlarını paylaşaraq digər şirkətləri xəbərdar etmək üçün hesabat hazırlayıb.
Secureworks kibertəhlükəsizlik firmasının məlumatına görə, həmin şəxs yayda subpodratçı kimi işə götürülüb və şirkətin uzaqdan iş alətlərindən istifadə edərək korporativ kompüter şəbəkəsinə çıxış əldə edib. O, giriş əldə etdikdən sonra daxili sistemlərdən mümkün qədər çox məlumatı gizli şəkildə endirərək hazırlıqlarını tamamladı.
Həmin şəxs aylarla işləməyə davam edib və bu müddət ərzində maaş almağa davam edib. Müstəntiqlər maaşın Şimali Koreyaya köçürüldüyünü və Qərbin sanksiyalarından qaçmaq üçün pulların mürəkkəb yuyulma prosesindən keçdiyini deyirlər.
Şirkət bu işçini zəif performansa görə işdən çıxaranda haker oğurlanmış məlumatlarla birlikdə altı rəqəmli kriptovalyuta tələb edib. O, ödəniş edilmədiyi təqdirdə məlumatların dərc ediləcəyi və ya onlayn satılacağı ilə hədələyib.
Şirkətin fidyəni ödəyib-ödəmədiyi açıqlanmayıb.
Mənbə: TGRT