Bugun.Tv xəbər verir ki, 1969-cu il oktyabrın 29-da kompüterlər arasında məlumat ötürülməsi tarixində mühüm hadisə baş verib. ABŞ-da yerləşən iki kompüter arasında göndərilən ilk mesaj cəmi iki hərfdən — “LO” hərflərindən ibarət olub. Halbuki göndərilməsi nəzərdə tutulan söz “LOGIN” idi.
Kaliforniya Universitetinin Los-Anceles kampusunda (UCLA) çalışan proqramçı Çarli Klayn professor Leonard Kleynrokun rəhbərliyi altında mesajı Kaliforniyadakı Stenford Tədqiqat İnstitutunun kompüterinə göndərməyə çalışıb. Həmin dövrdə kompüterlər arasında əlaqə yaratmağa imkan verən ARPANET şəbəkəsindən istifadə olunurdu. Bu şəbəkə sonradan müasir internetin inkişafına zəmin yaradıb.
Klayn əvvəlcə “L”, sonra isə “O” hərfini göndərib və qarşı tərəfdəki kompüter onları qəbul edib. Lakin üçüncü hərf — “G” göndərilərkən sistem sıradan çıxıb. Beləliklə, tarixə düşən ilk mesaj “LO” olub.
Maraqlıdır ki, təxminən bir saat sonra texniki problem aradan qaldırılıb və “LOGIN” sözü uğurla göndərilib.
Bu hadisə o dövrdə sadəcə texniki sınaq sayılsa da, uzaqda yerləşən kompüterlərin bir-biri ilə əlaqə qurmasının mümkünlüyünü nümayiş etdirib. Bu gün milyardlarla insanın istifadə etdiyi internetin inkişaf yolunda həmin iki hərf simvolik başlanğıclardan biri hesab olunur.