İran prezidenti Pezeşkian Qətər əmiri Şeyx Təmim bin Həməd Al Tani ilə telefon danışığı aparıb.
İran mediası xəbər verir ki, Pezeşkian Qətər əmiri ilə telefon danışığı zamanı ölkəsinin Qətərdəki ABŞ bazasını raketlərlə hədəfə almasının səbəblərinə toxunub.
“Dünən baş verən hadisə yalnız İran ərazisinə birbaşa və açıq hücuma cavab idi”. Pezeşkian bildirib ki, İran dost, qardaş və qonşu ölkə olan Qətərə qarşı heç bir müxalifət niyyətində deyil.
İran xalqı və hökumətinin Qətərin İrana qarşı dostluq və qardaşlıq münasibətindən xəbərdar olduğunu bildirən Pezeşkian, xüsusilə çətin anlarda göstərilən bütün dəstək, həmrəylik və əməkdaşlığa görə minnətdarlığını bildirib.
ABŞ-la danışıqlara toxunan Pezeşkian, “Məsələlərin həlli üçün danışıqlar aparırdıq. Lakin bu danışıqlar davam edərkən bizə hücum edildi. Danışıqlar təklifləri var idi, lakin təzyiq və hərbi hücum altında aparılan danışıqlar bizim üçün qəbuledilməz idi. Çünki onlar təcavüzkarın tələblərini irəli sürmək məqsədi güdürdülər. Ona görə də ilk olaraq Z rejim tərəfindən hücuma müvafiq cavab verildi”.
İsrail və onun havadarlarının İranın Qəzza, Livan və ya Suriya olmadığını gördüklərini və bir neçə hücumla İranın sabitliyini pozaraq öz məqsədlərinə çata bilməyəcəklərini vurğulayan Pezeşkian İran xalqının sona qədər müqavimət göstərəcəyini və qanuni haqlarını müdafiə edəcəyini qeyd edib.
Qətər əmirinə müharibənin sona çatması üçün göstərdiyi bütün səylər, dəstək, həmrəylik və İranla səmimi əməkdaşlığa görə təşəkkür edən Pezeşkian deyib: “Sizin və Qətər xalqının dünənki raket hücumunun yalnız ABŞ-ın sionist rejimin hərbi hücumunda iştirakına cavab olduğunu və Qətərə qarşı qətiyyən heç bir niyyəti olmadığını bilmənizi istərdim”.
Pezeşkian İranın Qətərlə konstruktiv, dostluq və qardaşlıq münasibətlərini inkişaf etdirməyi hədəflədiyini və ilk fürsətdə Dohaya getmək və ikitərəfli əlaqələrin inkişaf etdirilməsi üçün həll yolları barədə əmirlə danışmaq istədiyini bildirib.
Qətər əmiri Şeyx Təmim bin Həməd Al Tani deyib ki, bu telefon danışığı təkcə dost və qonşu İran prezidenti ilə deyil, həm də “dərin dostluq münasibətində olduqları səmimi dost”la olub.
Ölkəsinin İsrailin İrana hücumu da daxil olmaqla, regionu bu cür gərginliklərdən uzaq tutmaq üçün həm aşkar, həm də gizli şəkildə böyük səylər göstərdiyini dilə gətirən Qətər əmiri bunu İran xalqına məhəbbətlə və qonşu, dost və qardaş ölkə qarşısındakı borclarının tələbi olaraq etdiklərini bildirib.
ABŞ-ın Qətərdəki bazasından İrana qarşı heç bir hücum üçün istifadə edilmədiyini və istifadə edilməyəcəyini bildirən Qətər əmiri belə bir şeyə qəti şəkildə icazə verməyəcəklərini vurğulayıb.
Mənbə: İlkha