İran hakimiyyəti sosial şəbəkələrdə yayılan məlumatlarla bağlı genişmiqyaslı əməliyyat həyata keçirib. Rəsmi açıqlamaya əsasən, 466 nəfər ictimai sabitliyi pozmaq, dezinformasiya yaymaq və təhlükəsizlik riskləri yaratmaq ittihamı ilə saxlanılıb.
Bugun.tv xəbər verir ki, hüquq-mühafizə orqanları bu şəxslərin sosial media platformaları üzərindən cəmiyyətdə qorxu və çaşqınlıq yaratmağa çalışdıqlarını iddia edir. Bildirilir ki, saxlanılan şəxslər müxtəlif onlayn şəbəkələr vasitəsilə koordinasiyalı fəaliyyət göstərərək ictimai rəyə təsir etməyə cəhd ediblər.
İran polisi açıqlamasında qeyd edib ki, əməliyyat ölkənin milli təhlükəsizliyinin qorunması və informasiya mühitində sabitliyin təmin edilməsi məqsədi daşıyır. Həmçinin vurğulanıb ki, bu cür fəaliyyətlərə qarşı nəzarət tədbirləri daha da gücləndiriləcək.
Rəsmilər əlavə edib ki, saxlanılan şəxslərlə bağlı araşdırmalar davam edir və onların digər əlaqələri də yoxlanılır. Son dövrlərdə regionda artan gərginlik fonunda İran hakimiyyəti informasiya təhlükəsizliyi məsələlərinə xüsusi diqqət ayırır.
Mənbə: TASS