Koreyalılar İran səfirliyi qarşısında “şərəfsiz” şüarı ilə etiraz aksiyası keçiriblər.
Bugün.tv Azad İran xəbər portalına istinadən bildirir ki, Koreya vətəndaşları İranın Seuldakı səfirliyinin Güney azərbaycanlı alpinist Elnaz Rekabinin mediaya müsahibəsinə icazə verməməsinə sərt reaksiya veriblər.
Sosial şəbəkələrdə yayılan videoda koreyalıların İranın Seuldakı səfirliyi qarşısında “bişərəf” və “Qadın, həyat, azadlıq” şüarları ilə etiraz aksiyası keçirdikləri əks olunub.
Xatırladaq ki, sözügedən aksiya Güneyli alpinist Elnaz Rekabinin dırmanma üzrə çempionatın finalında hicabsız çıxışından sonra bir müddət yoxa çıxdığı, ona basqıların və məcburi şəkildə İrana qaytarılması ilə bağlı xəbərlər yayıldığı vaxt keçirilib.
İrandakı etirazlara dəstək verən bir qrup Koreya vətəndaşı oktyabrın 19-da İranın Seuldakı səfirliyi qarşısında mətbuat konfransı keçirərək, İran rejimindən beynəlxalq yarışa qatılan qadın alpinist Elnaz Rekabinin məcburi şəkildə İrana qaytarılmasını izah etməyi tələb ediblər.
Bəzi etirazçılar da saçlarını kəsərək zərfə qoyub səfirlik binasına göndəriblər.
