İranın xarici işlər naziri Abbas Erakçi ölkəsinin ABŞ-la birbaşa əlaqədə olması barədə yayılan iddiaları qəti şəkildə təkzib edib. Nazir bu barədə açıqlamanı X sosial şəbəkəsində yayıb.
Erakçi bildirib ki, ABŞ Prezidenti Donald Trumpın Yaxın Şərq üzrə xüsusi nümayəndəsi Steve Witkoff ilə son təmaslar yalnız ABŞ və İsrailin İrana qarşı həyata keçirdiyi hücumlardan əvvəl baş tutub. Onun sözlərinə görə, bundan sonra tərəflər arasında heç bir birbaşa əlaqə olmayıb.
Nazir vurğulayıb ki, əksini iddia edən məlumatlar əsassızdır və ictimaiyyəti, eləcə də enerji bazarını çaşdırmaq məqsədi daşıyır. O qeyd edib ki, bu cür xəbərlər xüsusilə neft bazarında spekulyativ təsirlərə səbəb ola bilər.
Qeyd edək ki, ABŞ-ın Axios saytı anonim mənbələrə istinadən Erakçi ilə Witkoff arasında birbaşa əlaqələrin davam etdiyini iddia etmişdi. Rəsmi Tehran isə bu məlumatları qətiyyətlə rədd edərək, ölkənin mövqeyinin dəyişmədiyini bəyan edib.
Mənbə: TrtHaber