ABŞ və İran arasında əldə olunan atəşkəsə baxmayaraq, İsrail Livana qarşı genişmiqyaslı hücumlara başlayıb.
Məlumata görə, İsrail ordusu cəmi 10 dəqiqə ərzində Livanın müxtəlif bölgələrində təxminən 100 hədəfə eyni vaxtda zərbə endirib. Hücumların paytaxt Beyrut, Bekaa vadisi və ölkənin cənub hissələrini əhatə etdiyi bildirilir.
Beyrutun mərkəzi ərazilərində baş verən zərbələr zamanı azı 9 partlayış səsi eşidilib. Xüsusilə əhalinin sıx yaşadığı Dahiye bölgəsində hədəf alınan obyektlərdən tüstü qalxdığı qeyd olunur. Hücumların heç bir xəbərdarlıq edilmədən həyata keçirildiyi vurğulanır.
İsrail ordusu açıqlamasında zərbələrin “Hizbullah”a məxsus komanda mərkəzləri və hərbi obyektləri hədəf aldığını iddia edib. Rəsmi Tel-Əviv bu hücumları Livana qarşı indiyə qədərki ən genişmiqyaslı əməliyyat kimi qiymətləndirir.
Livan Səhiyyə Nazirliyinin məlumatına görə, hücumlar nəticəsində onlarla insan həyatını itirib, yüzlərlə şəxs yaralanıb. Hazırda xilasedici və tibbi briqadalar dağıntılar altında qalanların çıxarılması istiqamətində işləri davam etdirir.
Bu arada, İsrailin Baş naziri Binyamin Netanyahu ABŞ və İran arasında əldə olunan atəşkəsin Livanı əhatə etmədiyini bildirib. Lakin vasitəçi kimi çıxış edən Pakistan rəsmiləri Livanın da razılaşmaya daxil olduğunu açıqlayıb.
Fransa Prezidenti Emmanuel Macron isə Livanın atəşkəs prosesinə daxil edilməsinin vacibliyini vurğulayıb.
İran tərəfi isə İsrailin bu hücumlarını atəşkəsin pozulması kimi qiymətləndirərək cavab tədbirləri görülə biləcəyini istisna etməyib.
Mənbə: Ensonhaber