Suriya silahlı qüvvələri komandanlığının “SANA” xəbər agentliyinə istinadən verdiyi məlumata görə, İsrail Hərbi Hava Qüvvələrinin Dəməşqin cənub-qərb rayonlarına raket hücumu nəticəsində biri suriyalı hərbçi də daxil olmaqla azı 5 nəfər həlak olub.
“İsrail bu gün Suriyaya qarşı hava təcavüzü həyata keçirib”, – deyə məlumatda bildirilir: Raketlər işğal altındakı Qolan təpələri üzərindəki hava məkanından bəzi bölgələrə atılıb. Dəməşq şəhəri və ətrafdakı tətil yaşayış məhəllələrindəki evlərin dağıdılması da daxil olmaqla, xeyli maddi ziyana səbəb olub.
Biri hərbçi olmaqla 5 nəfər həlak olub, 15-i yaralanıb. Xəstəxanaya çatdırılanlardan bəzilərinin vəziyyətinin ağır olduğu bildirilir.
Bugun.tv xəbər verir ki, Suriya hava hücumundan müdafiə qüvvələri hava hədəflərinə atəş açıb və bir neçə raketi vurmağa nail olub.
Dubaydan yayımlanan “Əl-Hədas” telekanalı İsrailin Dəməşqin cənub-qərbindəki şiə milis düşərgəsinə zərbələr endirdiyini bildirib. Onun məlumatına görə, zərbə Suriyanın cənubundakı Əs-Suveyda radar stansiyasına da endirilib.
Xatırladaq ki, yanvarın 2-də İsrailin Dəməşqin cənub ətrafına hücumu zamanı iki suriyalı hərbçi həlak olub, ikisi isə yaralanıb. Suriya paytaxtında beynəlxalq hava limanı saatlarla bağlanıb.