Yaxın Şərqdə vəziyyət kəskinləşməkdə davam edir. İsrail tərəfi İranın yüksək səviyyəli təhlükəsizlik rəsmilərindən birinin – Əli Laricaninin öldürüldüyünü iddia edib. Bildirilir ki, həmçinin İranın hərbi strukturlarından olan Bəsic qüvvələrinin rəhbəri də zərbələr nəticəsində həyatını itirib. İran tərəfi isə bu iddialara hələlik rəsmi münasibət bildirməyib.
Eyni zamanda, İraqın paytaxtı Bağdad şəhərində yerləşən ABŞ səfirliyinin yaxınlığında partlayış baş verib. Məlumata görə, hava hücumundan müdafiə sistemləri əraziyə yönələn mərmini zərərsizləşdirib. Qeyd olunur ki, səfirlik bir neçə gün əvvəl də hücuma məruz qalmışdı.
Region üzrə hərbi əməliyyatlar genişlənməkdədir. İsrail Tehranda “rejim infrastrukturuna”, Beyrutda isə Hizbullah hədəflərinə qarşı genişmiqyaslı zərbələr endirdiyini açıqlayıb. Bununla yanaşı, Əbu-Dabidə dron hücumundan sonra qaz yatağında əməliyyatların dayandırıldığı, həmçinin neft limanı yaxınlığında bir tankerin naməlum mərmi ilə vurulduğu bildirilir.
Digər tərəfdən, Hörmüz boğazı ətrafında vəziyyət də diqqət mərkəzindədir. ABŞ Prezidenti Donald Trumpın çağırışlarına baxmayaraq, NATO müttəfiqləri bölgədə dəniz əməliyyatlarının genişləndirilməsindən imtina edib. İran rəsmiləri isə bu strateji su yolunun artıq əvvəlki kimi təhlükəsiz olmayacağını bəyan ediblər.
Mütəxəssislər eyni zamanda bildirirlər ki, regionda davam edən qarşıdurma qlobal enerji bazarına da ciddi təsir göstərir və neft qiymətlərində qeyri-sabitlik yaradır.
Mənbə: CNN