Konqo Demokratik Respublikasının (KDR) paytaxtı Kinşasada Rusiyanın siyasətinə və Prezident Vladimir Putinə dəstək üçün böyük mitinq keçirilib. Burada gənc konqolular Rusiya bayraqları ilə küçələrə çıxıb və Moskva ilə əməkdaşlıq üçün çıxış ediblər.
“Putin, bizə kömək etməyə gəl! Rusiya kimi etibarlı tərəfdaşlara ehtiyacımız var!”
Bugun.tv TASS-a istinadən xəbər verir ki, bu barədə mitinqin təşkilatçısı Bruno Mimbenqa bildirib.
Eyni zamanda, nümayişçilər Fransanın KDR-dəki səfirliyi qarşısına toplaşıblar. Onlar Emmanuel Makronun qarşıdan gələn səfərinə etiraz ediblər. Etiraz “Makron qatildir”, “O, KDR balkanlaşmasının xaç atasıdır”, “Konqolular Fransanın siyasətinə yox deyir” şüarları altında keçirilib.
Etirazçılar Fransanı KDR ilə qarşıdurmada Ruandanın əsas müttəfiqi hesab etdiklərinə diqqət çəkiblər. Kinşasa Ruandanın paytaxtı Kiqalini Konqo ərazisində üsyançıları dəstəkləməkdə ittiham edir.
Qeyd edək ki, bu həftənin sonunda Makronun Afrika ölkələri ilə pisləşən münasibətləri düzəltmək üçün Kinşasaya gəlməsi planlaşdırılır.