Bugun.tv xəbər verir ki, Böyük Britaniya sahillərində 1680-ci ildə batan “Phoenix” gəmisinin qalıqları uzun illər davam edən araşdırmalardan sonra müəyyən edilib. Kəşfin ən maraqlı tərəfi isə dalğıc və tədqiqatçı Todd Stivensin köhnə xəritədəki cəmi üç sözün izinə düşməsi olub.
Ensonhaber-in məlumatına görə, Stivens Qrinviçdəki Milli Dənizçilik Muzeyinin arxivində araşdırma apararkən xəritədə “Cap Wildy lost” qeydini görüb. Bu ifadənin gəmi kapitanı Uilyam Uildinin itkin düşdüyü əraziyə işarə etdiyini düşünən tədqiqatçı axtarışlarını Silli adaları yaxınlığındakı Western Rocks bölgəsində cəmləşdirib.
1670-ci ildə inşa edilmiş, 46 topu olan “Phoenix” gəmisi 1680-ci il yanvarın 11-də əlverişsiz hava şəraiti səbəbindən qayalıqlara çırpılaraq batıb.
Stivens 2017-ci ildə bölgədə dalışlara başlayıb. Sonrakı araşdırmalar zamanı gəminin qalıqları ilə yanaşı, qızıl və gümüş sikkələr, zinət əşyaları, qılınc parçaları, naviqasiya alətləri və şəxsi əşyalar aşkar edilib.
Tapılan tarixi əşyalar Silli adalarının muzeyinə bağışlanıb. Onların gələcəkdə dənizçilik tarixinə həsr olunmuş sərgidə nümayiş etdirilməsi planlaşdırılır.
Mənbə: Ensonhaber