Müasir dövrdə kişilərin kosmetik vasitələrdən istifadəsi və dəriyə qulluq etməsi getdikcə daha geniş yayılır.
Bu barədə kosmetoloq İşita Daniel açıqlama verib.
Mütəxəssisin sözlərinə görə, kişilər arasında ən çox satılan məhsullar gigiyena vasitələridir. Bunların arasında dezodorant və antiperspirantlar ilk yeri tutur. Onları təraş üçün gel və köpüklər, həmçinin şampun və duş gelləri izləyir. Ən çox tələb olunan məhsullar sırasına həmçinin ətirlər, təraş aparatları və dəyişdirilə bilən ülgüc başlıqları da daxildir.
Kosmetoloq qeyd edib ki, kişilərin öz görünüşünə diqqət yetirməsi artıq cəmiyyətdə normal qəbul olunur. Bu tendensiya gender stereotiplərinin dəyişməsi, gözəllik sənayesinin sürətli inkişafı və medianın təsiri ilə bağlıdır.
İşita Daniel kişilərə dəriyə qulluqla bağlı bir sıra tövsiyələr də verib. Onun sözlərinə görə, həftədə 1–3 dəfə AHA və BHA turşuları ilə pilinq etmək dəridəki ölü hüceyrələri təmizləməyə və dəri səthini daha hamar etməyə kömək edir.
Kosmetoloq yeni başlayanlar üçün qulluq prosesini sadə saxlamağı məsləhət görür.
Mütəxəssis qeyd edib ki, əsas üç addım kifayətdir: dərinin təmizlənməsi, nəmləndirilməsi və günəşdən qorunması.
Digər kosmetik vasitələr isə ehtiyac yarandıqca mərhələli şəkildə istifadə oluna bilər.
Mənbə: mail.ru