“Bu tarixi hadisədir. Sərhəd-keçid məntəqəsinin qurulması, şübhəsiz ki, Azərbaycan ərazilərində təxribat həyata keçirmək istəyən bütün qüvvələrin atacağı addımların qarşısını alacaq. Bundan sonrakı proseslərdə – həm renteqrasiya prosesində, həm də bölgədə sülhün və təhlükəsizliyin təmin olunmasına öz töhvəsini verəcək”.
Bu sözləri Bugun.tv-yə müsahibəsində politoloq Elçin Mirzəbəyli deyib.
“Bu günə qədər həyata keçirilən işlər, atılan addımlar böyük önəm daşıyır. Amma indiki şəraitdə, məhz Laçında, Ermənistanla sərhəddə, sərhəd-keçid məntəqəsinin qurulması faktiki olaraq həm də, milli iradəmizin ortaya qoyulması və Azərbaycana qarşı həyata keçirilən bütün proseslərin qarşısına poladdan nida işarəsinin olması deməkdir. Bu aspektdən bütün xalqımızı təbrik edirəm! Düşünürəm ki, bundan sonraki proseslər milli iradəmizin ifadə etdiyi kimi, son nəticəyə varacaq və Azərbaycan öz hədəflərinə doğru addım-addım irəliləyəcək”,- politoloq E.Mirzəbəyli əlavə edib.
Müxbir: Qaytən Qasımzadə