“Azərbaycanla Ermənistan arasında Yekun sülh müqaviləsinin imzalanması istiqamətində proseslər aktiv fazaya keçib. Kreml rəhbərliyi sənədin məhz Moskvada bağlanmasına çalışır və bu məqsədlə iki ölkəyə vaxtaşırı mesajlar göndərilir. Lakin ekspertlər bildirirlər ki, sülh müqaviləsinin hər iki ölkənin delimitasiya olunmuş sərhədində imzalanması da mümkündür və bunun üçün nə Vaşinqtonun, nə də digər paytaxtların iştirakı zəruri deyil.
Bununla belə, geosiyasi proseslərin dəyişməsi fonunda Yekun sülh müqaviləsinin yenidən Vaşinqtonda imzalanması ehtimalı da gündəmdə qalır. Xüsusilə Rusiyanın artan təzyiqlərinin fonunda prosesin ABŞ platformasına qaytarılması mümkün sayılır.
Qeyd edək ki, hər iki ölkənin vətəndaş cəmiyyəti nümayəndələri arasında dialoq davam edir. Məlumatlara görə, Rusiya bu prosesin genişlənməsinin qarşısını almağa çalışır, lakin artan təzyiqlər Azərbaycan və Ermənistanın sülh prosesinə dair mövqeyini dəyişə bilmir”.
Bu fikirləri Milli Cəbhə Partiyasının sədr müavini, siyasi ekspert Məhəmməd Əsədullazadə öz sosial media hesabında paylaşıb.
Ekspert həmçinin qeyd edib ki, bölgədə baş verən dəyişikliklər fonunda Azərbaycan ilə Ermənistan arasında münasibətlərin normallaşması üçün yeni imkanlar yaranır və sülh müqaviləsinin imzalanması regional təhlükəsizlik üçün əsas şərtlərdən biridir.