Pakistanın Bəlucistan əyalətində məktəb yaxınlığında bombalı hücum baş verib. Hücumda 5-i tələbə və 1-i polis olmaqla 7 nəfər ölüb. Səlahiyyətlilər ən azı 30 nəfərin yaralandığını açıqlayıb.
Bəlucistan əyalətinin Mastunq bölgəsində məktəb yaxınlığında patrul edən polis maşınına bombalı hücum təşkil edilib. Hücumda 5-i tələbə və 1-i polis olmaqla 7 nəfər həyatını itirib, 30 nəfər yaralanıb. Səlahiyyətlilər ölən tələbələrin yaşlarının 10-13 arasında olduğunu, yaralananlar arasında 4 polis əməkdaşının olduğunu qeyd edib. Partlayış nəticəsində ətrafdakı binalara və avtomobillərə də ziyan dəyib. Hələlik heç kim hücuma görə məsuliyyəti üzərinə götürməyib. Baş nazir Şahbaz Şərif və Bəlucistanın baş naziri Sərfaraz Buqti hücumu pisləyib. Terrorçuların günahsız tələbələri və məmurları hədəf aldığını bildirən Buqti, bunun üçün cavab verəcəklərini vurğulayıb. Pakistanda hücumlar xüsusilə Əfqanıstanla həmsərhəd olan Hayber Paxtunxva və Bəlucistan əyalətlərində cəmləşib. Hər iki əyalətdə puştun və bəluc etnik qruplarının hüquqlarını müdafiə etdiklərini iddia edən silahlı qruplar Pakistan təhlükəsizlik qüvvələrinə və mülki şəxslərə qarşı hücumlar təşkil edir. İslamabad Pakistan Talibanının (TTP) Əfqanıstanda yerləşdiyini və hücumlarını oradan təşkil etdiyini iddia etsə də, Əfqanıstan administrasiyası bu iddiaları rədd edir.
Bəlucistanda Bəlucistan Azadlıq Ordusunun (BLA) hücumları nəzərə çarpır. BLA, Bəlucistan əyalətinin Pakistandan ayrılmasını və bu bölgəyə Bəluc xalqının hakim olmasını istəyir.
Bəlucistan Pakistanın təbii sərvətlərlə zəngin əyalətidir, lakin region ölkənin qalan hissəsindən daha az inkişaf edib.
Zaman zaman BLA xüsusilə təhlükəsizlik qüvvələrinə, Bəlucistana işləməyə gələn mülki şəxslərə və orada iş görən şirkətlərə hücum edir.
Pakistan Münaqişə və Təhlükəsizlik Araşdırmaları İnstitutunun məlumatına görə, ötən il yaraqlılar Bəlucistanda azı 170 hücum həyata keçirib, nəticədə 151 mülki şəxs və 114 təhlükəsizlik işçisi həlak olub.
Mənbə: TGRT