Fransa Prezidenti Emmanuel Makron Parisdəki Yelisey Sarayında Fələstin Prezidenti Mahmud Abbasla görüşüb.
Görüş zamanı Fələstin Dövlətinin yaradılması prosesinin irəliləməsi üçün “birgə komitə”nin yaradılması barədə razılığa gəlinib. Komitənin konstitusiya və institusional çərçivənin yaradılması üzərində işləyəcəyi bildirilib.
Görüşdə 10 oktyabrdan bəri qüvvədə olan Qəzzada atəşkəsin tətbiqi, təhlükəsizlik məsələləri və yenidənqurma hazırlıqları müzakirə edildiyi bildirilib.
Görüşdə həmçinin Fələstin ərazilərində demokratik proseslərin dirçəldilməsinin və azad seçkilərin keçirilməsinin vacibliyi vurğulanıb.
Görüşdən sonra Makron və Abbas birgə mətbuat konfransı keçiriblər. Fələstin ərazilərində zorakılığın artmasından sonra Makron İsrailin Qərb Şəriyəsini ilhaq etmək planlarına qarşı xəbərdarlıq edərək deyib: “Qismən və ya tam ilhaq planları, istər qanuni, istərsə də de-fakto, Avropa tərəfdaşlarımızla birlikdə sərt şəkildə cavab verəcəyimiz qırmızı xətt təşkil edir. Məskunlaşma zorakılığının və məskunlaşma layihələrinin artması Qərb Şəriyəsinin sabitliyini və beynəlxalq hüququ pozaraq yeni səviyyələrə çatıb”.
Makron Qəzzaya fasiləsiz humanitar yardım çatdırılmasının vacibliyini vurğulayıb. O, ölkəsinin bu il Qəzzaya 100 milyon avro humanitar dəstək verəcəyini və yardımın təcili humanitar ehtiyacları ödəmək üçün istifadə olunacağını bildirib.
Abbas açıqlamasında müharibə bitdikdən sonra prezident və parlament seçkilərinin keçirilməsi də daxil olmaqla, “islahatlara” sadiq olduğunu bir daha vurğulayaraq dedi: “Fələstin Dövlətinin müvəqqəti konstitusiyasının layihəsini, eləcə də seçkilər və siyasi partiyalarla bağlı qanunları tamamlamaq üzrəyik”.
Əlaqələrinin bir hissəsi olaraq Abbasın Parisdə Fransa Milli Assambleyasının sədri Yal Braun-Pivet və parlament üzvləri ilə görüşməsi gözlənilir.
Mənbə: EnSonHaber