Bugun.tv xəbər verir ki, Media Tədris Mərkəzinin 6 aylıq təlimləri uğurla başa vuran tələbələri sertifikat alıb. Yunus Əmrə İnstitutunun Bakı nümayəndəliyində keçirilən təqdimetmədə tanınmış televiziyaçılar, məşhur aparıcılar, uzun illər peşəkar jurnalistikada imzası olan və gələcəyin jurnalistlərinə təlimlər keçən media kapitanları iştirak ediblər.
Media Tədris Mərkəzinin rəhbəri Elnarə Dərziyeva tədbirdə mərkəzin qısa zaman ərzində qazandığı uğurlardan danışıb. “Öyrəndik ki, öyrədək” devizini əsas götürdüklərini deyən Əməkdar jurnalist təlimlərə qatılanlar arasında televiziya jurnalistikasına maraq göstərənlərin çox olduğunu bildirib.
“Media Tədris Mərkəzinin rəsmi qeydiyyatdan keçməsindən 2 il ötür. Tədris ocağı olaraq üzərimizə peşəkar jurnalist yetişdirmək kimi mühüm missiya götürmüşük. Düşünürəm ki, uğurlu fəaliyyətimizlə Azərbaycan mediasının inkişafına öz töhfəmizi verə bilirik. Bu işdə yaratdığım “Bu gün tv”nin də rolu böyükdür. Çünki tələbələrimiz məhz bu informasiya agentliyi ilə internet televiziyasında öyrəndiklərini praktik olaraq həyata keçirirlər, təcrübə qazanırlar. Bu gün də növbəti dəfə məzunlarımıza sertifikatlar təqdim edirik. Onu da deyim ki, biz burada yalnız düzgün yazmağı, oxumağı, peşəkar jurnalist olmağı deyil, həm də vətənini sevən, dövlətinin suverenliyi uğurunda əlindən gələni əsirgəməyən vətəndaş yetişdirməyi qarşımıza məqsəd qoymuşuq. Əminəm ki, tələbələrimiz öz fəaliyyətləri ilə çalışdıqları media qurumlarında ölkəmizin inkişafı istiqamətində uğurlu nəticələrə nail olacaqlar”, – E.Dərziyeva əlavə edib.
Sonra çıxış üçün söz təlimçilərə verilib. Onlar MTM-in bugünkü fəaliyyətini uğurlu, lazımlı hesab ediblər.
İki il ərzində təşkil olunan təlimlərə qatılıb, jurnalistikanın müxtəlif sahələri üzrə biliklərini bölüşən media kapitanları, müasir Azərbaycan jurnalistika tarixində əməyi ilə seçilənlər tədris mərkəzinin fəaliyyətinə uğurlar diləyib, öz dəstəklərini əsirgəməyəcəklərini bildiriblər.
Media sahəsinə marağın günü-gündən artdığı bir dönəmdə tələbələrə sensasiya dalınca qaçmayan, öz imzasına hörmət edən, sayılan-seçilən, qərəzsiz və vicdanlı jurnalistlərdən olmağı arzulayıblar.
Sonda 6 ay ərzində təlimlərə qatılan tədbir iştirakçıları, peşəkar KİV mütəxəssisləri tədris mərkəzinin tələbələrinə sertifikatlar təqdim ediblər.
Qeyd edək ki, iki ildir fəaliyyət göstərən Media Tədris Mərkəzində bu sahəni əhatə edən – jurnalistika, aparıcılıq, nitq mədəniyyəti-natiqlik, operatorluq, fotoqrafiya, montajçı və sair peşələr üzrə tələbələr yetişdirilir.
Onlara ölkənin bu sahədə peşəkar, ixtisaslaşmış ali təhsil ocaqlarının müəllimləri, tanınmış media agentliklərinin rəhbərləri, televiziya mütəxəssisləri, məşhur aparıcılar, rəsmi qurumların mətbuat katibləri, ictimai-siyasi xadimlər öz sahələri (ictimai-siyasi, sosial, mədəniyyət və s.) üzrə təlimlər keçir, təcrübələrini bölüşürlər.
Müxbir: İntizar Əmirova