Bugun.tv xəbər verir ki, İngiltərə ilə Fransa arasında La-Manş boğazında nizamsız miqrantların olduğu qayığın batması nəticəsində 6 nəfər həyatını itirib, 50-dən çox adam xəstəxanalara aparılıb. Britaniya sahil mühafizə gəmiləri axtarış-xilasetmə işləri üçün bölgəyə hərəkət edib. Bölgədə axtarış-xilasetmə işləri Fransa gəmiləri və helikopterləri ilə aparılıb. Xilas edilən qeyri-qanuni miqrantların bəziləri Fransanın Kale şəhərində, bəziləri isə İngiltərənin Dover şəhərindəki xəstəxanalara köçürülüb. Böyük Britaniya ilə patrul müqaviləsindən sonra Fransa qeyri-qanuni miqrantların qarşısını almaq üçün sahildə patrul fəaliyyətini 40 faiz artırıb. Böyük Britaniya 2018-ci ildən bəri Manş boğazı vasitəsilə ölkəyə 100 min qeyri-qanuni miqrantın daxil olduğunu, ilin əvvəlindən isə avqustun 10-na bu rəqəmin 15 min 826 nəfər olduğunu açıqlayıb. Təkcə avqustun 10-da adaya qeyri-qanuni yollarla 755 nəfərin gəldiyi müəyyən edilib və bu rəqəm 2023-cü ildə ən yüksək nizamsız immiqrant girişi olaraq qeydə alınıb.
Müxbir: Şəms Elnurqızı