Bugun.tv– xəbər verir ki, Milli Məclisin deputatı Ceyhun Məmmədov “Müasir dövrdə ailə dəyərlərimiz” mövzusunda elmi-praktiki konfransda iştirak edib.
Millət vəkilinin sözlərinə görə, Xəzər Universiteti, İzmir Katip Çelebi Universiteti, Azərbaycan Respublikasının Gəncliyə Yardım Fondu və İstanbul Ailə Vəqfinin birgə təşkilatçılığı ilə keçirilən bu önəmli tədbir müasir dövrdə ailə institutunun üzləşdiyi çağırışları müzakirə etmək baxımından olduqca faydalı olub.
Qeyd edək ki, deputat çıxışında ailə modelinə yönəlmiş mənəvi, sosial və mədəni təhdidlərdən, eləcə də ailə dəyərlərinin qorunmasında cəmiyyətin, dövlətin və təhsil sisteminin üzərinə düşən məsuliyyətdən bəhs edib.
“Əminəm ki, bu kimi elmi və praktiki tədbirlər ailə dəyərlərinin daha geniş şəkildə təbliğinə və gənc nəsildə ailəyə bağlılıq hissinin möhkəmləndirilməsinə böyük töhfə verir. Təşkilatçılara təşəkkür edir, uğurlu fəaliyyətlərinin davamlı olmasını arzu edirəm” deyə Ceyhun Məmmədov çıxışında bildirib.
