Bugun.tv xəbər verir ki, Pakistanda iyunun 25-dən bəri davam edən təsirli musson yağışları nəticəsində həyatını itirənlərin sayı 80-ə yüksəlib.
Milli Fəlakət İdarəsi Agentliyinin (NDMA) açıqlamasına görə, Pəncab, Sind və Bəlucistan əyalətlərində son 24 saat ərzində yağan güclü yağışlar nəticəsində 4 nəfər ölüb, 9 nəfər yaralanıb.
Ümumilikdə, fəlakət və qəzalarda ölənlərin sayı 80-ə, yaralıların sayı isə 142-yə çatıb. Hər il iyun-sentyabr aylarında yağan musson yağışları Pakistana böyük ziyan vurur.
Ötən il isə bu ölkədə musson yağışlarının səbəb olduğu daşqınlar nəticəsində 1739 nəfər həlak olub. Daşqın fəlakətinin ölkəyə vurduğu zərərin 30 milyard dollardan çox olduğu açıqlanıb.