“Napoli”nin koreyalı mərkəz müdafiəçisi Kim Min Cen “Bavariya”ya keçir. Belə ki, o transfer üçün şəxsi müqavilə ilə bağlı şifahi razılığa gəlib.
Bugun.tv xəbər verir ki, bu barədə məşhur futbol insayderi Fabrizio Romano məlumat yayıb. Onun sözlərinə görə, Münhen klubu koreyalının müqaviləsində göstərilən məbləği ödəməkdə qalır.
Romano daha sonra bildirib ki, Kim beş illik müqaviləyə razılaşıb. Beləliklə, müqavilə 2028-ci ilin yayına qədər qüvvədə olacaq. Onun müqaviləsindəki satın alma məbləği təxminən 50 milyon avrodur. “Bavariya” bu seçimi aktivləşdirən və İtaliya klubuna ödəniş edən kimi transfer başa çatmış sayılacaq.
Qeyd edək ki, koreyalı müdafiəçi İtaliya klubunun ölkə çempionluğunu qazandığı və Çempionlar Liqasının 1/4 finalına yüksəldiyi “Napoli”nin fenomenal mövsümünün əsas simalarından birinə çevrildi.