NATO-da 32 üzv ölkənin iştirak etdiyi ilin ilk Müdafiə Nazirləri Toplantısı öz işinə başlayıb.
Bugun.tv xəbər verir ki, toplantının açılışında çıxış edən NATO-nun Baş katibi Mark Rutte bildirib ki, görüşdə Alyansın çəkindirmə və müdafiə imkanlarının daha da gücləndirilməsi, həmçinin Ukraynaya dəstəyin davam etdirilməsi məsələləri müzakirə olunacaq.
Rutte qeyd edib ki, son dövrlər müttəfiq ölkələrin müdafiə xərclərində ciddi artımlar müşahidə olunur. Onun sözlərinə görə, toplantıda NATO-nun müdafiə mövqeyinin gücləndirilməsi və Alyansın ümumi təhlükəsizliyinin təmin olunması əsas prioritetlərdəndir.
Baş katib həmçinin NATO üzrə müdafiə sənayesi bazasının gücləndirilməsi istiqamətində görülən işlərin də qiymətləndiriləcəyini vurğulayıb. O bildirib ki, bu tədbirlər Alyansın bütün coğrafiyası üzrə – cənubdan Arktikaya, şərqdən qərbə qədər – ümumi təhlükəsizlik baxımından mühüm əhəmiyyət daşıyır.
Rutte əlavə edib ki, Rusiyanın artan hərbi fəallığı və Çinin Arktik bölgəyə marağının yüksəlməsi fonunda NATO “Arktik Nöbeti” adlı yeni təşəbbüsə start verib.
Toplantıda 2025-ci ildə Haaqada keçirilmiş NATO Zirvəsində müdafiə xərclərinin artırılması ilə bağlı qəbul edilən qərarlar əsasında Ankarada keçiriləcək növbəti zirvəyə hazırlıq məsələləri də müzakirə olunacaq.
Görüşdə Ukraynanın yeni müdafiə naziri Mihaylo Fedorov, eləcə də Avropa İttifaqının Xarici əlaqələr və təhlükəsizlik siyasəti üzrə ali nümayəndəsi Kaja Kallasın da iştirak edəcəyi bildirilib.
Mənbə: TRT Haber