NATO-nun baş katibi Mark Rutte “El Pais” qəzetinə müsahibəsində Ukraynadakı müharibənin bu ilin sonuna qədər başa çata biləcəyini bildirib. Bununla belə, o, mümkün sülh razılaşmasından sonra belə Rusiyanın uzun müddət region üçün təhlükə olaraq qalacağını vurğulayıb.
Rutte, ABŞ Prezidenti Donald Trampın Ukrayna ilə bağlı sülh planını “müzakirələr üçün yaxşı əsas” adlandıraraq bildirib ki, təklif əlavə araşdırma və dialoq tələb edən mühüm elementlərə malikdir: “Ukraynalılar və ABŞ hazırda məhz bunun üzərində işləyirlər”.
NATO rəhbəri həmçinin vurğulayıb ki, Ukraynanın Alyansa qoşulması məsələsində Rusiya heç bir söz və ya veto hüququna malik deyil. Lakin o, hazırda bir çox müttəfiqin, o cümlədən ABŞ-ın Ukraynanın yaxın vaxtlarda NATO-ya qəbuluna isti baxmadığını qeyd edib. Rutte əlavə edib ki, bu şəraitdə Ukraynaya Rusiya tərəfindən yeni işğal cəhdlərinin qarşısını almaq üçün adekvat təhlükəsizlik təminatları verilməlidir.
“Trampın fikrini tam bölüşürəm: Bu qırğın dayandırılmalıdır”, – deyən Rutte, ABŞ və Ukrayna nümayəndə heyətlərinin Cenevrədəki son görüşündən sonra əlavə müzakirələrin və paralel diplomatik proseslərin zəruri olduğunu bildirib: “Hələ nəticəyə yaxın deyilik”.
Müsahibənin sonunda Rutte, ABŞ Prezidenti Trampı bəyəndiyini və onu tam dəstəklədiyini qeyd edib: “Bəli, mən onu bəyənirəm. O, münaqişələri fəal şəkildə həll edir. Hamımız Trampın prezidentliyindən məmnun olmalıyıq. Ona böyük rəğbətim var”.
Mənbə: HaberGlobal