Bugun.tv xəbər verir ki, NATO qüvvələri Svalbard arxipelaqı yaxınlığında Rusiya gəmilərinin hərəkətini izləyib. The Guardian-ın yaydığı məlumata görə, Qərb rəsmiləri həmin gəmilərin sualtı kommunikasiya kabellərinə qarşı mümkün təxribat fəaliyyəti ilə bağlı hazırlıq keçirdiyini bildiriblər.
Məlumata əsasən, Rusiya gəmilərində sualtı qayıq tipli vasitələrdən istifadə etməklə kabelləri sıradan çıxarmağa imkan verə biləcək gizli texnologiyanın sınaqdan keçirildiyi ehtimal olunur. Hadisənin Svalbard yaxınlığında baş verdiyi və NATO müttəfiqlərinin, o cümlədən Böyük Britaniya, Norveç və ABŞ-ın fəaliyyəti izlədiyi qeyd edilir.
Söhbət Norveçi Svalbardla birləşdirən, dənizin dərinliklərindən keçən mühüm fiber-optik kabellərdən gedir. Bu xətlər Svalbarddakı peyk məlumatlarının ötürülməsində mühüm rol oynayır.
Norveçin müdafiə naziri Tore Sandvik bildirib ki, birgə əməliyyat vasitəsilə Rusiyaya gizli fəaliyyətlərin diqqətdən kənarda qalmayacağı barədə mesaj verilib.
The Guardian qeyd edir ki, Rusiya daha əvvəl NATO ölkələrində təxribat fəaliyyəti həyata keçirmək ittihamlarını rədd edib.
Mənbə: The Guardian