Əksəriyyət ev şəraitində hazırlanan turşuların daha ziyansız olduğunu düşünür. Əslində isə bu yanlışdır. Çünki zəhərlənmə təkcə fabrikdə yox, evdə hazırlanan turşularda da qeydə alınır. Konservləşdiriliş qidadan zəhərlənmə – botulizm bəzən ölümlə də nəticələnə bilir. Bu səbəbdən qidaları almazdan, qəbul etməzdən öncə bilməli olduğumuz məqamlar var.
Bugun.tv xəbər verir ki, bu cür zəhərlənmələrə daha çox meyvə-tərəvəzlərdən hazırlanan turşular səbəb olur. Mütəxəssislərin botulizm adlandırdığı bu xəstəliyin əsas səbəbi isə müxtəlif növ bakteriya, virus, parazit və yaxud kimyəvi maddələrlə çirklənmiş qida məhsullarının istehlakıdır.
Baş toksikoloq Azər Maqsudovun sözlərinə görə, botulizm ağır kəskin toksik infeksiyadır. Oksigen olmayan şəraitdə infeksiya inkişaf edir və kütləvi şəkidlə zəhərlənməyə gətirib çıxarır. Çox vaxt isə həyati təhlükə yaradır. “Tez bir vaxtda ürəkbulanma, qusma, mədə nahiyəsində ağrılarla özünü biuzə verir. Bədənin hərarəti qalxır və getdikdə qarşısı alınmasa vəzyyət kəskinləşir və xəstə huşunu itirə bilir. Ev şəraitindəki türkəçarələrlə botulizmin qarşısını almaq olmaz. Biz mütəxəssislər məsləhət görmürük. Çünki xəstə müayinə olunmasa, ona zərdab vurulmasa həyatı böyük bir risk altında qala bilər”.
Müxbir: Qaytən Qasımzadə