Ermənistanın baş naziri Nikol Paşinyan və Rusiya prezidenti Vladimir Putin cümə günü qondarma Dağlıq Qarabağdakı vəziyyəti və Laçın dəhlizini müzakirə etmək üçün telefonla danışıblar.
Bugun.tv TASS-a istinadən xəbər verir ki, bu barədə Ermənistan Nazirlər Kabineti məlumat yayıb.
Telefon danışığı zamanı guya Azərbaycanın Laçın dəhlizinin qanunsuz blokadası nəticəsində qondarma Dağlıq Qarabağda davam edən humanitar böhran müzakirə olunub. Baş nazir Paşinyan Dağlıq Qarabağdakı böhranın həlli ilə bağlı danışarkən, Rusiya sülhməramlı missiyasının ardıcıl addımlarının vacibliyini qeyd edib.
Tərəflər Cənubi Qafqazda nəqliyyat əlaqələrinin bərpası yollarını da müzakirə ediblər. Onlar Ermənistan, Rusiya və Azərbaycan liderlərinin 9 noyabr 2020-ci il, 11 yanvar və 26 noyabr 2021-ci il və 31 oktyabr 2022-ci il tarixlərində qəbul etdikləri üçtərəfli bəyanatların icrası ilə bağlı məsələləri nəzərdən keçiriblər.