Bugun.tv xəbər verir ki, polisin keçirdiyi əməliyyat zamanı keçmiş məhkumdan metamfetamin aşkar edilib. Onun sosial şəbəkələrdə gənclər və yeniyetmələr arasında cinayəti təbliğ edən musiqili meyxanalar paylaşdığı müəyyən edilib. Polis əməkdaşları tərəfindən vəziyyətlə bağlı əməliyyat tədbirləri keçirilib. Əməliyyat zamanı narkotik maddələrin qanunsuz dövriyyəsi ilə məşğul olan paytaxt sakini Mahir Qonşuyev saxlanılıb.
Daxili İşlər Nazirliyinin Mətbuat Xidmətindən verilən məlumata görə, axtarış zamanı onun üzərindən yüksək təsiredici xassəyə malik külli miqdarda psixotrop maddə olan metamfetamin aşkarlanıb. Həmçinin M.Qonşuyevin sosial şəbəkələrdə “Mahir Ay Brat“ adlı səhifə də yaradıb. O, paylaşımlarda əsasən gənclər və yeniyetmələr arasında cinayəti, həmçinin narkotik maddələrin istifadəsi kimi zərərli vərdişləri təbliğ edib. Faktla bağlı Cinayət Məcəlləsinin müvafiq maddəsi ilə cinayət işi başlanılıb. M.Qonşuyev barəsində məhkəmə tərəfindən həbs qətimkan tədbiri seçilib. Araşdırmalar davam etdirilir.
Sosial şəbəkə istifadəçilərinə, gənclərə, yeniyetmələrə, özündə cinayəti və zərərli vərdişləri ehtiva edən videolar, musiqilər, həmçinin digər bu tipli mövzularda olan məlumatları paylaşmamağı tövsiyə edilir.