Kremlin sözçüsü Dmitriy Peskov Rusiyada bir müddət əvvəl bloklanan WhatsApp tətbiqinin, ölkə qanunlarına əməl etdiyi təqdirdə yenidən istifadəyə açılmasının mümkün olduğunu bildirib.
Bugun.tv xəbər verir ki, Peskov bu barədə Rusiyanın TASS agentliyinə açıqlamasında danışıb. O, WhatsApp-ın Meta şirkətinə məxsus olduğunu xatırladaraq qeyd edib ki, məsələ əsasən qanunlara riayət olunması ilə bağlıdır.
“Əgər Meta Rusiya qanunlarına əməl edib Rusiya qurumları ilə əlaqə yaratsa, o zaman razılaşma əldə etmək mümkün ola bilər”, – deyə Peskov vurğulayıb.
Kremlin sözçüsü əlavə edib ki, Meta Rusiyanın tələblərini nəzərə almasa, WhatsApp Rusiyada yenidən açılmayacaq.
Qeyd edək ki, Rusiya Federal İnformasiya Texnologiyaları və Kütləvi Kommunikasiya Nəzarəti Xidməti (Roskomnadzor) 2025-ci ilin noyabrında yaydığı açıqlamada, qanun pozuntuları səbəbilə WhatsApp-a mərhələli şəkildə bloklama tətbiq edildiyini bildirmişdi.
Həmin tarixdən sonra ölkədə WhatsApp-a giriş tam dayandırılıb və istifadəçilər tətbiqə daxil olmaq üçün əsasən VPN xidmətlərindən istifadə etməyə başlayıblar.
Məlumata görə, Rusiyada Telegram tətbiqinə də müəyyən məhdudiyyətlər tətbiq edilir. Bu fonda yaxın zamanda istifadəyə verilən yerli MAX tətbiqi isə xüsusilə dövlət qurumlarında sürətlə yayılmağa başlayıb.
Mənbə: TrtHaber