Rusiya prezidenti Vladimir Putin İranla hərtərəfli strateji tərəfdaşlıq sazişinin ratifikasiyası haqqında qanunu imzalayıb.
Rusiya ilə İran arasında münasibətlərdə irəliyə doğru daha bir addım atılıb. Rusiya prezidenti Vladimir Putin İranla hərtərəfli strateji tərəfdaşlıq sazişinin ratifikasiyası haqqında qanunu imzalayıb. Putinin təsdiq etdiyi saziş Rusiyanın rəsmi hüquqi informasiya portalında dərc olunub.
Saziş Moskva ilə Tehran arasında uzunmüddətli əməkdaşlığın inkişafı üçün hüquqi baza yaradır. Rusiya və İrana rəsmən “strateji tərəfdaş” statusu verən saziş müdafiə, terrorla mübarizə, enerji, maliyyə, nəqliyyat, sənaye, kənd təsərrüfatı, elm, mədəniyyət və texnologiya da daxil olmaqla bütün sahələri əhatə edir.
İranın xarici işlər naziri Abbas Arakçi ötən həftə Moskvada Putinlə görüşüb. Arakçi İran və Rusiya arasında imzalanması planlaşdırılan “Hərtərəfli Strateji Tərəfdaşlıq Sazişi”nin iki ölkə arasında əməkdaşlığın göstəricisi olduğuna işarə edərək, əlaqələrin bütün sahələrdə dərinləşdirilməsi lazım olduğunu bildirmişdi.
Putin isə görüş zamanı ikitərəfli münasibətlərin, eləcə də regional və beynəlxalq məsələlərdə əməkdaşlıq və koordinasiyanın iki xalqın maraqlarına xidmət etdiyini və regional sabitliyi gücləndirdiyini vurğulayıb.
Mənbə: HaberGlobal