ABŞ Prezidenti Donald Trampın təşəbbüsü ilə Qəzza Sülh Şurasının yaradılması ilə bağlı müqavilə imzalanıb. Mərasimdə Qəzzada sülhün təmin edilməsi və bölgənin yenidən qurulması istiqamətində qətiyyət nümayiş etdirilib.
7 oktyabr 2023-cü ildən HƏMAS və İsrail arasında davam edən və ağır humanitar fəlakətə səbəb olan müharibə, 10 oktyabr 2025-ci ildə ABŞ-ın vasitəçiliyi ilə əldə olunan atəşkəslə böyük ölçüdə dayandırılmışdı. Atəşkəsin ikinci mərhələsi çərçivəsində Qəzza Sülh Şurası rəsmi şəkildə elan olunub.
Türkiyəni mərasimdə xarici işlər naziri Hakan Fidan təmsil edib. Atılan imzalarla Şura hüquqi olaraq fəaliyyətə başlayıb.
Çıxışında Donald Tramp Qəzzanın düzgün idarə olunacağını və sistemli şəkildə yenidən qurulacağını bildirib. O, Şuranın fəaliyyəti nəticəsində beynəlxalq ictimaiyyətlə birlikdə mühüm və müsbət addımlar atılacağını qeyd edib.
Tramp İsraillilər və fələstinlilər arasında onilliklərdir davam edən zorakılığa son qoymaq niyyətində olduqlarını vurğulayaraq, gələcək nəsillər üçün sülhün təmin ediləcəyini deyib. ABŞ prezidentinin sözlərinə görə, bu təşəbbüs təkcə Amerika üçün deyil, bütün dünya üçün həyata keçirilir və qlobal sülhün mirası olacaq.
Qəzza Sülh Şurasının sədri olduğunu bildirən Tramp, qurumu bəşər tarixində ən mühüm beynəlxalq strukturlardan biri kimi dəyərləndirib və bir çox ölkənin bu prosesə qoşulmaq istədiyini açıqlayıb.
Çıxışında Birləşmiş Millətlər Təşkilatını da tənqid edən Tramp, qurumun böyük potensiala malik olduğunu, lakin ondan səmərəli istifadə edilmədiyini deyib. O, rəhbərliyi dövründə səkkiz müharibənin dayandırılmasına nail olduğunu və bu proseslərdə BM ilə əməkdaşlıq etmədiyini bildirib.
ABŞ prezidenti həmçinin İranla bağlı açıqlama verərək, Tehranın dialoqa hazır olduğunu və yaxın dövrdə danışıqların aparılacağını bildirib.
Mənbə: EnSonHaber