İsrailin hücumları və uzunmüddətli mühasirə şəraitində ağır yaşam mübarizəsi aparan Qəzza sakinləri, çətinliklərə baxmayaraq Ramazan ayını ümidlə qarşılamağa hazırlaşır. Qəzza zolağının cənubunda yerləşən Xan Yunus şəhərindəki Necat Qaçqın Düşərgəsində yaşayan fələstinlilər artıq üçüncü ildir davam edən çadır həyatının yaratdığı ağır şəraitə baxmayaraq Ramazanı daha xoş ab-havada keçirmək üçün hazırlıqlara başlayıblar.
Düşərgə sakinləri yoxsulluq və qeyri-müəyyənlik içində əvvəlki illərdəki kimi daha gözəl Ramazan günlərinin arzusunu yaşayır.
Çadırlar fənərlər və bayraqlarla bəzədilib
Ramazan hilalının çadırlarda belə sönməyəcəyini göstərmək istəyən düşərgə sakinləri çadırları bəzəmək üçün təşəbbüs göstəriblər. Çadırlara “Xeyirli Ramazanlar” yazıları asılıb, kartonlardan Ramazan fənərləri hazırlanıb, düşərgə ərazisi Fələstin bayraqları ilə bəzədilib.
Axşamlar işıqlandırma yaratmaq üçün bayraqların arasına lampalar və led işıqlar yerləşdirilib. Məscidin dirəyindən isə böyük Ramazan fənəri asılıb. Uşaqlar üçün düşərgə meydanında yelləncək və trambolin qurularaq, heç olmasa bir qədər bayram ovqatı yaradılmağa çalışılıb.
“Süfrədə heç kim əskik olmasın”
Düşərgədə yaşayan uşaqlardan Məhəmməd Abdulfəttah Fucu bildirib ki, ağır şəraitə baxmayaraq özlərini sevindirməyə çalışırlar. Onun sözlərinə görə, Ramazan ayı süfrələr, iftar və sahur görüşləri, bəzəklər və birlik ruhu ilə daha da mənalı olur.
Fucu İslam dünyasına çağırış edərək qeyd edib ki, müharibənin dayandırılması və Ramazan ayında bombardmanların olmaması üçün səy göstərilməlidir:
“Bu mübarək ayda heç kimi itirmək istəmirik. Biz süfrəyə oturanda bir nəfərin əskik olmasını istəmirik. Çox ailə sabah süfrəyə yaxınlarını itirmiş şəkildə oturacaq.”
O, əvvəlki Ramazanları böyük həsrətlə xatırladığını və müharibənin çox böyük yaralar açdığını bildirib.
“Ramazanı evimizdə qarşılayacağıq”
Düşərgə sakinlərindən Dima Zuğrub isə Ramazan hazırlıqları çərçivəsində karton qutulardan fənərlər düzəltdiklərini söyləyib. O, Ramazanı böyük sevinc və evlərinə qayıtmaq ümidi ilə qarşıladıqlarını vurğulayıb:
“Rəfahı çox darıxırıq. İnşallah ən qısa zamanda evimizə dönəcəyik. Burada qalmayacağıq, mütləq qayıdacağıq.”
Zuğrub Ramazanı çadırlarda deyil, öz evlərində qarşıladıqları günlərin həsrətini yaşadıqlarını qeyd edib.
“Bu il daha yaxşı olsun”
Düşərgə sakinlərindən Əbu Mahmud Aşur isə Rəfahdan Xan Yunusa köç etdiklərini bildirərək Qəzza əhalisinin bu il də Ramazanı çətin şərtlər altında qarşılayacağını deyib.
Aşur, “Bu ilki Ramazan, inşallah əvvəlkilərdən daha yaxşı olar” sözləri ilə sülh və sakitlik arzusunu ifadə edib.
Müharibənin ağır kölgəsinə baxmayaraq Necat düşərgəsində çadırların bəzədilməsi və uşaqların sevinc dolu görüntüsü, Qəzza sakinlərinin ümidlərini qorumağa çalışdığını bir daha göstərib.
Mənbə: Ensonhaber