Müsəlmanların müqəddəs kitabı Qurani-Kərimi yandıraraq İsveçdə böyük qəzəb doğuran Salvan Momikanın güllələnərək öldürüldüyü bildirilib.
İsveçin SVT telekanalının məlumatına görə, səhər saatlarında Stokholmun cənubundakı Södertälje şəhərində 38 yaşlı kişi güllə yarası ilə tapılıb.
TV güllələnən şəxsin Qurani-Kərimi yandıran Salvan Momika olduğunu və onun aldığı xəsarətlərdən dünyasını dəyişdiyini bildirib.
Cümə axşamı Stokholm Dairə Məhkəməsi “millətə əsaslanan nifrətin qızışdırılması” ittihamı üzrə hökm elan etməli idi. Lakin “müttəhimlərdən birinin ölümünün təsdiqlənməsi” səbəbindən hökmün elanı təxirə salınıb.
Polis hadisə ilə bağlı və öldürülən şəxsin kimliyi ilə bağlı hələlik açıqlama verməyib. SVT-dən alınan məlumata görə, təhlükəsizlik qüvvələri hadisə ilə bağlı istintaqa müdaxilə edərkən çox sayda adam nəzarətə alındı. Hadisə yerinin ətrafı mühasirəyə alınsa da, mənzilin ətrafında axtarışlar davam edir.
Salvan Momika 2018-ci ildə İraqdan İsveçə gəlib və 2021-ci ildə üç illik yaşayış icazəsi alıb. 2024-cü ilin yayında müvəqqəti yaşayış icazəsi bir il müddətinə uzadıldı. İsveç prokurorları Momikanı “millətə əsaslanan nifrəti qızışdırmaqda” ittiham edib. O, 2023-cü ilin yayında Stokholmda Qurani-Kərimi dörd yerdə yandırmaqda günahlandırılıb.
2023-cü il iyunun 28-də bütün dünya müsəlmanları əsas dini bayramlardan biri olan Qurban bayramını qeyd edərkən Stokholmun mərkəzindəki meydanda ilk dəfə müsəlmanların müqəddəs kitabının yandırılması İslam dininin qəzəbinə səbəb olmuşdu.
Mənbə: İlkha